Irani kërkon mbledhje urgjente të OKB-së, pas sulmeve të SHBA-së
Sh.Ç|RTKlive
Irani i ka kërkuar Këshillit të Sigurimit të Kombeve të Bashkuara të mblidhet urgjentisht për të dënuar sulmet ajrore të Shteteve të Bashkuara mbi tre centralet e tij bërthamore në Fordow, Natanz dhe Isfahan. Kërkesa u bë publike përmes një letre të ambasadorit iranian në OKB, Amir Saeid Iravani.
Në letër, Iravani e cilëson operacionin ushtarak të SHBA-së si një “kërcënim serioz ndaj paqes dhe sigurisë rajonale dhe ndërkombëtare”, duke akuzuar Uashingtonin për shkelje flagrante të Kartës së OKB-së dhe të Traktatit për Mospërhapjen e Armëve Bërthamore (NPT).
Gjithashtu, ai pretendoi se vendet e goditura ishin nën monitorimin e Agjencisë Ndërkombëtare të Energjisë Atomike (IAEA).
“Ky akt i paligjshëm duhet të dënohet publikisht dhe ata që janë përgjegjës nuk duhet të mbeten pa u ndëshkuar”, thuhet në letër.
Irani, i cili është përballur me tensione të vazhdueshme me SHBA-në dhe Izraelin, e sheh këtë sulm si një përshkallëzim të drejtpërdrejtë të konfliktit dhe po kërkon mbështetje ndërkombëtare për të frenuar veprime të ngjashme në të ardhmen. Nuk ka ende reagim zyrtar nga Sekretari i Përgjithshëm i OKB-së apo nga anëtarët e përhershëm të Këshillit të Sigurimit.
Irani paralajmëron për `pasoja të përjetshme` pas sulmeve amerikane
Ministri i Jashtëm iranian, Abbas Araghchi ka paralajmëruar për “pasoja të përjetshme” pas sulmeve amerikane ndaj objekteve bërthamore iraniane.
“Ngjarjet e këtij mëngjesi janë të shëmtuara dhe do të kenë pasoja të përjetshme”, ka shkruar Araghchi në platformën X.
Araghchi ka akuzuar SHBA-në për kryerjen e një “shkeljeje të rëndë” të Kartës së OKB-së, ligjit ndërkombëtar dhe Traktatit të Mospërhapjes Bërthamore (NPT), duke sulmuar atë që ai e përshkroi si “instalime bërthamore paqësore”.
“Çdo anëtar i OKB-së duhet të alarmohet për këtë sjellje jashtëzakonisht të rrezikshme, të paligjshme dhe kriminale”, ka thënë kryediplomati i Iranit.
“Në përputhje me Kartën e OKB-së dhe dispozitat e saj që lejojnë një përgjigje legjitime në vetëmbrojtje, Irani ruan të gjitha opsionet për të mbrojtur sovranitetin, interesin dhe popullin e tij”, ka thënë ai.
Presidenti i SHBA-së, Donald Trump kërcënoi Iranin me sulme të mëtejshme nëse Teherani nuk kërkonte paqe, pas një sulmi ndaj objekteve bërthamore në vend.
“Ose do të ketë paqe, ose do të ketë tragjedi për Iranin shumë më të madhe se ajo që kemi parë gjatë tetë ditëve të fundit”, ka thënë Trump në një fjalim drejtuar kombit nga Shtëpia e Bardhë.
Trump tha se sulmet amerikane kishin shkatërruar plotësisht objektet kryesore të pasurimit bërthamor të Teheranit.























