Europol dhe Eurojust çmontojnë grupin hakerash pro-rus
BKT
Rajoni dhe Bota

Europol dhe Eurojust çmontojnë grupin hakerash pro-rus

rtsh

Agjencitë evropiane të sigurisë, Europol dhe Eurojust, njoftuan se kanë çmontuar rrjetin e hakerëve pro-rus NoName057(16), të dyshuar për një sërë sulmesh kibernetike ndaj Ukrainës dhe aleatëve të saj, duke goditur infrastrukturën kritike në BE.

Operacioni ndërkombëtar i zhvilluar më 15 korrik përfshiu 12 shtete dhe çoi në çmontimin e një botneti global, që përdorej për sulme DDoS ndaj institucioneve publike dhe kompanive energjetike e të transportit.

Autoritetet arrestuan dy persona, një në Francë dhe një tjetër në Spanjë, ndërsa Gjermania lëshoi gjashtë urdhër-arreste ndaj të dyshuarve rusë, dy prej të cilëve konsiderohen organizatorët kryesorë.

Grupi kibernetik, që mbështet publikisht Rusinë që nga fillimi i luftës në Ukrainë, ka sulmuar gjatë ngjarjeve të rëndësishme politike në Evropë. Vetëm në Gjermani janë regjistruar 14 sulme që prekën rreth 230 organizata.

Sulme të ngjashme u regjistruan në Suedi, ku në shënjestër ishin faqet zyrtare dhe bankat, në Zvicër gjatë Samitit të Paqes në qershor, si dhe në Holandë gjatë samitit të NATO-s.

Autoritetet evropiane vijojnë hetimet dhe kanë paralajmëruar se sulmet kibernetike të sponsorizuara nga shtetet janë një kërcënim në rritje për sigurinë dhe demokracinë në Evropë.


MË SHUME NGA Rajoni dhe Bota