Kremlini: Putin e ftoi Zelenskyn në Moskë për bisedime, jo për t’u dorëzuar
RTKlive/RTSH
Pas ftesës së bërë nga presidenti rus Vladimir Putin ndaj homologut të tij ukrainas për një takim mes tyre në Moskë dhe refuzimit të vendtakimit nga ana e Volodymyr Zelenskyt, Kremlini vijon të këmbëngulë se ftesa është bërë për të biseduar dhe për të prodhuar një rezultat dhe jo për t’u dorëzuar.
“Putini e ka ftuar Vladimir Zelenskyn në Moskë për të folur, jo për t’u dorëzuar”, zëdhënësi i Kremlinit, Dmitry Peskov.
Ndërsa përparimi drejt zgjidhjes së konfliktit vazhdon, Peskov thekson se është shumë herët për të parashikuar një rezultat: “Putin tha se ka dritë në fund të tunelit“, shtoi ai.
Rusia, vuri në dukje ai, është e gatshme të arrijë qëllimet e saj në Ukrainë me mjete paqësore, por nëse kjo rezulton e pamundur, operacioni ushtarak special do të vazhdojë.
Ky koment vjen pasi Zelensky deklaroi se takimi me Putin është i nevojshëm por se nuk mund të zhvillohet në Moskë.























