Liderja e opozitës në Venezuelë fiton Nobelin për Paqe
BKT
Rajoni dhe Bota

Liderja e opozitës në Venezuelë fiton Nobelin për Paqe

E.Hoti/RTKlive

Komiteti Norvegjez i Nobelit ka shpallur Maria Corina Machado, lideren e opozitës në Venezuelë, fituese të Çmimit Nobel për Paqe 2025. Ajo u nderua për përpjekjet e saj të guximshme dhe paqësore në mbrojtje të demokracisë dhe të drejtave të njeriut në një prej regjimeve më represive të Amerikës Latine.

Në arsyetimin e Komitetit thuhet se Machado ka qenë një figurë kyçe në bashkimin e opozitës venezueliane, duke e orientuar atë drejt një tranzicioni paqësor nga autoritarizmi në demokraci.

Ajo është vlerësuar për guximin qytetar dhe qëndrueshmërinë në përballje me shtypjen politike, ndjekjet penale dhe përjashtimin nga zgjedhjet presidenciale të vitit 2024.

Si themeluese e organizatës "Súmate", e cila promovon zgjedhje të lira dhe të ndershme, Machado ka qenë për më shumë se dy dekada një zë i palëkundur për pavarësinë gjyqësore, qeverisjen demokratike dhe përfaqësimin popullor në Venezuelë.

Komiteti vuri në dukje se përkundër pengesave të shumta nga regjimi autoritar, Machado dhe lëvizja opozitare që ajo përfaqëson vepruan me mjete demokratike dhe paqësore, duke mobilizuar qindra mijëra qytetarë në mbrojtje të votës dhe të drejtës për zgjedhje të lira.

“Rezistenca paqësore dhe përkushtimi i saj ndaj demokracisë janë shembuj të fuqishëm të shpresës në kohë të errëta”, thuhet në njoftimin  e Komitetit.


MË SHUME NGA Rajoni dhe Bota