Protestat `No Kings` kanë tërhequr mijëra njerëz në gjithë SHBA-në
Dardan Ramabaja / RTK
Turma të mëdha njerëzish kanë marrë pjesë në protestat "Pa Mbretër" kundër politikave të Presidentit Donald Trump në qytete anembanë SHBA-së, duke përfshirë Nju Jorkun, Uashington DC, Çikagon, Miamin dhe Los Anxhelosin.
Mijëra njerëz mbushën sheshin ikonik Times Square të qytetit Nju Jork, me njerëz që mbanin pankarta me slogane si "Demokraci jo Monarki" dhe "Kushtetuta nuk është opsionale".
Departamenti i Policisë së Nju Jorkut tha se më shumë se 100,000 njerëz ishin mbledhur në të pesë lagjet e qytetit dhe se nuk kishte arrestime në lidhje me protestën.
Përpara demonstratave, aleatët e Trump akuzuan protestuesit se ishin të lidhur me lëvizjen e ekstremit të majtë Antifa dhe dënuan atë që e quajtën "tubimi i urrejtjes së Amerikës".
Disa shtete amerikane kanë mobilizuar Gardën Kombëtare. Por organizatorët thanë se ngjarjet ishin paqësore.
Që kur u kthye në Shtëpinë e Bardhë në janar, Trump ka zgjeruar fushëveprimin e pushtetit presidencial, duke përdorur urdhra ekzekutivë për të çmontuar pjesë të qeverisë federale dhe për të vendosur trupa të Gardës Kombëtare në qytetet amerikane, pavarësisht kundërshtimeve nga guvernatorët e shteteve.
Ai gjithashtu u ka bërë thirrje zyrtarëve më të lartë të zbatimit të ligjit të administratës që të ndjekin penalisht armiqtë e tij të perceptuar.
Presidenti thotë se veprimet e tij janë të nevojshme për të rindërtuar një vend në krizë dhe i ka hedhur poshtë akuzat duke i quajtur histerike, se ai po sillet si diktator ose fashist.
Por kritikët paralajmërojnë se disa nga lëvizjet e administratës së tij janë jokushtetuese dhe një kërcënim për demokracinë amerikane.
Në një intervistë me Fox News, e cila do të transmetohej të dielën, Trump u shfaq për t'iu drejtuar tubimeve.
"E dini - ata po më referohen si mbret. Unë nuk jam mbret."
Në të gjithë Evropën, pati gjithashtu demonstrata në Londër, Berlin, Madrid, Romë e gjetiu, ndërsa njerëzit treguan solidaritet me homologët e tyre amerikanë.























