Katër palestinezë të vrarë, OKB dënon zjarrin izraelit
BKT
Rajoni dhe Bota

Katër palestinezë të vrarë, OKB dënon zjarrin izraelit

Luan Qorraj/RTK

Edhe pse armëpushimi mes Izraelit dhe Hamasit vazhdon të qëndrojë në fuqi, nga terreni ende vijnë njoftime për incidente të përditshme vdekjeprurëse. Sipas të dhënave të fundit, si pasojë e operacioneve të forcave izraelite, që nga orët e mëngjesit në incidente të ndara në Rripin e Gazës janë vrarë tre civilë palestinezë, ndërsa është njoftuar se një civil tjetër palestinez është vrarë në kampin e refugjatëve Fara’a, në afërsi të qytetit Tubas në Bregun Perëndimor.

Sipas raporteve mediatike, i riu palestinez u vra gjatë një operacioni të forcave izraelite, të cilat bastisën disa lagje të kampit, zyrtarisht në kërkim të militantëve.

Njëkohësisht, OKB-ja ka dënuar ashpër incidentin e fundit në Liban, ku sërish u raportua se forcat izraelite kanë hapur zjarr drejt paqeruajtësve të OKB-së të vendosur në jug të vendit, përgjatë kufirit mes Izraelit dhe Libanit.

Sipas OKB-së, forcat izraelite hapën zjarr nga një tank drejt paqeruajtësve të UNIFIL-it, të cilët ishin duke kryer detyrat e tyre të rregullta. Veprimi u dënua ashpër edhe nga autoritetet libaneze, ndërsa Tel Avivi zyrtar tha se incidenti ndodhi për shkak të “kushteve atmosferike dhe vizibilitetit të kufizuar”.

Megjithatë, OKB-ja tha se incidenti është shqetësues, pasi gjatë javëve të kaluara paqeruajtësit e UNIFIL-it disa herë janë gjendur nën zjarr izraelit dhe ka shtuar se i ka kërkuar Tel Avivit të urdhërojë përmbajtje të plotë të ushtarëve në zonat ku operojnë paqeruajtësit.


MË SHUME NGA Rajoni dhe Bota