Kryeministri Tusk paralajmëron reagim kundër narrativave anti-ukrainase
M.M./ RTKlive
Ministria e Digjitalizimit e Polonisë ka paralajmëruar reagim kundër dezinformimit rreth shpërthimit në hekurudhë dhe u ka bërë thirrje njerëzve të jenë të kujdesshëm ndaj raporteve online dhe të përpiqen të verifikojnë informacionet.
Një shpërthim në një linjë hekurudhore pranë fshatit Mika, të dielën në mbrëmje, dëmtoi një pjesë të linjës që transporton ndihma drejt Ukrainës, një incident që figura të larta të qeverisë polake e kanë cilësuar si akt sabotimi nga inteligjenca ruse.
Kryeministri polak, Donald Tusk, tha të martën se dy shtetas ukrainas që punonin për Rusinë dhe që njiheshin nga autoritetet polake dyshohen për hedhjen në erë të linjës hekurudhore.
“Të gjitha faktet tregojnë një gjurmë ruse”, tha Tusk, raporton euronews.
Megjithatë, kolektivi evropian i kërkimit dhe analizës ‘Res Futura Data House’ analizoi mijëra komente online mbi incidentin dhe gjeti se 42% e personave që komentonin fajësonin ukrainasit për sabotimin.
“Numri më i madh i komenteve sugjeron se njerëzit me origjinë ukrainase qëndrojnë pas incidentit,” shkroi Res Futura në një postim në X.
“Këto pretendime bazohen shpesh në ngjarje të mëparshme, si zjarret në objekte në Poloni, aktet e vandalizmit apo praninë e ukrainasve pranë infrastrukturës strategjike,” shtoi organizata.
“Shpesh hipotezohet se këto veprime kanë qenë hakmarrëse ose provokative, gjoja për të tërhequr Poloninë në një konflikt të drejtpërdrejtë me Rusinë.”
Vetëm 24% e deklaratave fajësonin rusët për sulmin, ndërsa 19% e komenteve ia atribuonin fajin shërbimeve të lidhura me shtetin polak.
Sipas ‘Res Futura’, përhapja e këtyre pretendimeve të rreme mund të lidhet me rënien e efektivitetit të Agjencisë së Sigurisë së Brendshme të vendit (ABW).
Gjatë paraqitjes së informacionit më të fundit në parlament, Tusk paralajmëroi kundër përhapjes së ndjenjave anti-ukrainase dhe dezinformimit online.
“Po bëhet gjithnjë e më e lehtë të nxisësh pakënaqësi anti-ukrainase për arsye të njohura, pasi gjithnjë e më shumë qytetarë polakë po mbajnë barrën e faktit se po strehojmë një numër kaq të madh refugjatësh dhe migrantësh,” tha ai.
“Nga këndvështrimi i interesave ruse, zgjimi i emocioneve radikale anti-ukrainase, dezinformimi i tipit se dronët ukrainas po sulmojnë Poloninë ose se ukrainasit po hedhin në erë trena, ka vlerë të dyfishtë për shërbimet ruse.”
Kryeministri polak shtoi gjithashtu se është në interesin e Rusisë të ndajë Perëndimin dhe ta largojë vëmendjen nga nevojat e Ukrainës, e cila është shumë më e dobët pa mbështetje ndërkombëtare.























