Një fëmijë i vrarë nga sulmet ruse, bisedimet për paqe në heshtje
BKT
Rajoni dhe Bota

Një fëmijë i vrarë nga sulmet ruse, bisedimet për paqe në heshtje

M.M./ RTKlive

Dronët rusë goditën një shtëpi në Ukrainën qendrore, duke vrarë një djalë 12-vjeçar, thanë zyrtarët, ndërsa sulmet e gjata ukrainase thuhet se shënjestruan një port rus dhe një rafineri nafte, në një kohë kur përpjekjet amerikane për paqe po zhvillohen larg syrit të publikut.

I dërguari i posaçëm i presidentit amerikan Donald Trump, Steve Witkoff, dhe dhëndri i Trumpit, Jared Kushner, pritej të takoheshin të enjten në Miami me një delegacion ukrainas, por nuk kishte konfirmim zyrtar nëse takimi ishte mbajturm, raporton AP.

Këto bisedime të planifikuara vinin pas diskutimeve mes presidentit Vladimir Putin dhe të dërguarve amerikanë në Kremlin të martën. Përpjekjet e mëparshme diplomatike për të thyer bllokadën nuk kanë dhënë rezultat dhe lufta pothuajse katërvjeçare ka vazhduar pa ndërprerje. Zyrtarët kryesisht kanë mbajtur të fshehta detajet e bisedimeve të fundit, megjithëse plani fillestar prej 28 pikash i Trumpit u publikua në media.

Presidenti ukrainas, Volodymyr Zelenskyy, tha se delegacioni i vendit të tij në Miami dëshiron të dëgjojë nga pala amerikane për bisedimet në Kremlin. Zelenskyy, ashtu si edhe liderët evropianë që e mbështesin atë, e kanë akuzuar në mënyrë të përsëritur Putinin se po zvarrit bisedimet e paqes ndërsa ushtria ruse përpiqet të shtyjë përpara pushtimin.

Zelenskyy tha në një adresim me video të enjten mbrëma se zyrtarët duan të dinë “cilat justifikime të tjera ka shpikur Putini për ta zvarritur luftën dhe për të ushtruar presion ndaj Ukrainës.”

Në rajonin qendror të Dnipropetrovskit në Ukrainë, një sulm me dron rus natën e së enjtes shkatërroi një shtëpi ku u vra djali dhe u plagosën dy gra, sipas kreut të administratës ushtarake rajonale, Vladyslav Haivanenko.

Forcat ajrore ukrainase thanë se Rusia lëshoi 137 dronë të tipeve të ndryshme gjatë natës.

Dronët ukrainas sulmuan një port në rajonin Krasnodar të Rusisë, në kufi me Ukrainën. Sulmi shkaktoi zjarr në portin detar Temryuk dhe dëmtoi infrastrukturën portuale, thanë zyrtarët.

Dronët ukrainas gjithashtu synuan më thellë brenda Rusisë, duke sulmuar qytetin Syzran në lumin Volga, tha kryebashkiaku Sergei Volodchenkov pa dhënë më shumë detaje.

Raportime të pakonfirmuara të mediave thanë se dronët ukrainas goditën një rafineri nafte në Syzran, rreth 800 kilometra në lindje të kufirit me Ukrainën.

Ministria ruse e Mbrojtjes tha se mbrojtja ajrore ruse ka rrëzuar 85 dronë ukrainas mbi rajone ruse dhe Krimenë e aneksuar në mënyrë të paligjshme gjatë natës.


MË SHUME NGA Rajoni dhe Bota