Lufta në Ukrainë, përleshje të ashpra në Zaporizhia
Sh.Ç|RTKlive
Presidenti i Ukrainës, Volodymyr Zelensky, paralajmëroi se lufta ruso-ukrainase ka arritur një moment simbolik dhe historikisht të errët, duke barazuar ditën e saj të 1,418-të me kohëzgjatjen e luftës së Gjermanisë naziste kundër Bashkimit Sovjetik gjatë Luftës së Dytë Botërore.
Zelensky e cilësoi këtë fakt si “çmenduri”, duke theksuar se konfliktet po zhvillohen në të njëjtat territore si 80 vite më parë Donbas, Slobozia dhe Zaporizhia – por kësaj here, sipas tij, “vetëm Ukraina po lufton kundër pushtuesve”.
Ai bëri thirrje për përpjekje të përbashkëta nga partnerët ndërkombëtarë, përfshirë vendet evropiane dhe Shtetet e Bashkuara, duke nënvizuar se vetëm përmes mbështetjes së koordinuar mund të ndalet agresioni rus.
Në terren, situata mbetet kritike. Përleshjet midis forcave ruse dhe ukrainase po vazhdojnë me intensitet të lartë në qytetin Gulyaipole, në rajonin e Zaporizhias. Sipas burimeve ushtarake ukrainase, trupat ruse kanë arritur të depërtojnë thellë në linjat mbrojtëse, duke e vështirësuar mbajtjen e pozicioneve ukrainase, ndërsa luftimet janë përqendruar gjithnjë e më shumë në qendër të qytetit.
Forcat ruse kanë ndërmarrë sulme të gjera ajrore ndaj Ukrainës, duke përdorur dronë dhe raketa. Shpërthime u dëgjuan në Kiev, ku një zjarr shpërtheu në një nga lagjet e kryeqytetit. Ndërkohë, sulmet ndaj Odesës shkaktuan dëme në infrastrukturë dhe ndërtesa banimi, ndërprenë energjinë elektrike në disa zona të qytetit dhe plagosën dy persona, sipas autoriteteve lokale.
Nga ana tjetër, Ministria ruse e Mbrojtjes njoftoi se sistemet e saj të mbrojtjes ajrore shkatërruan 13 dronë ukrainas gjatë natës mbi rajone të ndryshme të Rusisë. Sipas Moskës, katër dronë u rrëzuan mbi rajonin e Rostovit, dy mbi Krime dhe Adigje, si dhe mbi rajonin e Kurskut dhe Detin e Zi, ndërsa një u shkatërrua mbi rajonin e Voronezhit.
Shtabi i Përgjithshëm i Ukrainës konfirmoi se tre platforma nafte të korporatës ruse Lukoil në Detin Kaspik janë goditur. Ndërkohë, Drejtoria Kryesore e Inteligjencës Ushtarake të Ukrainës (GUR) publikoi fotografi të dronit më të ri rus, Geran-5, i përdorur në sulme të kombinuara që nga fillimi i vitit. Sipas vlerësimeve të GUR-it, ky mjet ajror “vështirë se mund të konsiderohet zhvillim rus”, duke theksuar ngjashmëri të forta me dronin iranian “Qarar”.
Në një tjetër zhvillim, forcat e armatosura ruse pretenduan se ekuipazhi i sistemit raketor kundërajror S-300 ka rrëzuar një avion luftarak ukrainas F-16 duke përdorur dy raketa. Autoritetet ukrainase nuk kanë reaguar ende ndaj këtij pretendimi.
Lufta vazhdon të përshkallëzohet në disa fronte njëkohësisht, duke thelluar krizën humanitare dhe duke rritur rrezikun e një destabilizimi më të gjerë rajonal, ndërsa thirrjet për ndërhyrje dhe mbështetje ndërkombëtare bëhen gjithnjë e më urgjente.























