Clinton për rastin Epstein: Unë s’pashë asgjë, nuk bëra asgjë të gabuar
BKT
Rajoni dhe Bota

Clinton për rastin Epstein: Unë s’pashë asgjë, nuk bëra asgjë të gabuar

Afet Bela/RTKLive

Ish-presidenti amerikan Bill Clinton deklaroi para Komitetit për Mbikëqyrje të Dhomës së Përfaqësuesve se “nuk pashë asgjë dhe nuk bëra asgjë të gabuar”, duke theksuar se “nuk kishte asnjë ide për krimet që Jeffrey Epstein po kryente”.

“E di çfarë kam bërë dhe, më e rëndësishmja, çfarë nuk kam bërë. Nuk pashë asgjë dhe nuk bëra asgjë të gabuar”, thuhet në deklaratën e tij hapëse.

Në pjesën përmbyllëse të deklaratës, Clinton tha se ndodhet përpara komisionit vetëm sepse Jeffrey Epstein i kishte fshehur krimet e tij “aq mirë për kaq gjatë”.

“Do të më dëgjoni shpesh të them se nuk më kujtohet. Kjo mund të jetë e pakënaqshme. Por nuk do të them diçka për të cilën nuk jam i sigurt. Ka kaluar shumë kohë. Dhe jam i detyruar nga betimi im të mos spekuloj apo të hamendësoj”, tha ai.

“Nuk ju ndihmon që unë të luaj detektivin 24 vjet më vonë”, shtoi Clinton, duke theksuar se është i gatshëm t’u përgjigjet pyetjeve “sipas mundësive të mia”, por se nuk do të deklarojë rrejshëm se mezi i pret ato.

Në fillim të fjalës së tij, Clinton reagoi edhe për dëshminë e bashkëshortes së tij, Hillary Clinton, duke thënë se ajo “nuk kishte asgjë të bënte” me Epstein.

“Ju e detyruat Hillary-n të vinte. Ajo nuk kishte asgjë të bënte me Jeffrey Epstein. Asgjë. Ajo nuk mban mend as ta ketë takuar”, deklaroi ai.

Clinton shtoi se, si dikush që është rritur në një familje me dhunë në familje, nuk do të kishte udhëtuar me avionin e Epstein nëse do të kishte pasur “ndonjë dyshim sado të vogël” për veprimet e tij, duke theksuar: “Do ta kisha denoncuar vetë”, raporton BBC.


MË SHUME NGA Rajoni dhe Bota