Melania Trump mohon lidhjet me Jeffrey Epstein, i quan ‘gënjeshtra`
Valbona Thaçi / RTKlive
Zonja e parë e Shteteve të Bashkuara, Melania Trump, ka mohuar kategorikisht çdo lidhje me financierin e ndjerë Jeffrey Epstein, duke i cilësuar pretendimet që qarkullojnë si të pavërteta dhe shpifëse.
Në një deklaratë publike të bërë nga Shtëpia e Bardhë, Melania Trump theksoi se nuk ka pasur asnjëherë marrëdhënie me Epstein-in dhe as dijeni për aktivitetet e tij kriminale.
Ajo i quajti pretendimet “gënjeshtra” dhe “shpifje”, duke kërkuar që përhapja e tyre të ndalet menjëherë. Sipas saj, këto histori po qarkullojnë në mënyrë të rreme në media dhe në rrjetet sociale, duke dëmtuar reputacionin e saj.
Reagimi i saj vjen në një kohë kur çështja e Jeffrey Epstein vazhdon të jetë në qendër të vëmendjes ndërkombëtare. Epstein, i cili u arrestua për akuza të rënda për trafikim seksual dhe abuzim me të mitur, kishte krijuar një rrjet të gjerë njohjesh me figura të njohura politike, biznesi dhe showbizi.
Pas vdekjes së tij në vitin 2019, rasti ka nxitur hetime dhe diskutime të shumta publike, ndërsa vazhdojnë të dalin pretendime dhe teori të ndryshme për lidhjet e tij me figura të njohura.
Në këtë kontekst, Melania Trump ka theksuar se çdo përpjekje për ta lidhur atë me Epstein-in është e pabazë dhe e dëmshme, duke kërkuar që informacionet e pasakta të mos shpërndahen më tej.























