Pas fitores ndaj Irlandës, Kosova nis përgatitjet për duelin me Austrinë
BKT
Sport

Pas fitores ndaj Irlandës, Kosova nis përgatitjet për duelin me Austrinë

F.B/RTKLive

Pas fitores 1-0 ndaj Irlandës, Kombëtarja e Kosovës i është rikthyer menjëherë përgatitjeve për ndeshjen e radhës në Ligën e Kombeve.

“Dardanët” të dielën mbrëma do të përballen me Austrinë në Vjenë, në duelin e dytë të këtij cikli.

Në seancën stërvitore të zhvilluar sot, përzgjedhësi Franco Foda kishte në dispozicion 16 futbollistë, ndërsa lojtarët që nisën nga minuta e parë ndaj Irlandës zhvilluan një seancë rigjeneruese në hotel.

Atmosfera në kampin e Kosovës para sfidës së radhës është pozitive, pas triumfit të arritur në “Fadil Vokrri”.

“Atmosfera në kampin dardan është pozitive dhe energjia është në nivelin më të lartë. Tashmë, i gjithë fokusi është te përgatitjet për sfidën e së dielës në Vjenë”, thuhet në njoftimin e Federatës së Futbollit të Kosovës.

Kosova synon ta vazhdojë serinë pozitive edhe në udhëtim ndaj Austrisë, në një tjetër përballje të rëndësishme në Ligën e Kombeve.

Një ndeshje e re, një sfidë e re – e njëjta zemër për Kosovën!