Vushtrria nderon të rënët në masakrën ndaj familjes së Selatin Gërxhaliut
BKT
Kosovë

Vushtrria nderon të rënët në masakrën ndaj familjes së Selatin Gërxhaliut

Në 20 vjetorin e vrasjes është përkujtuar sot në Vushtrri, njëra prej ngjarjeve më të dhimbshme të luftës, kur forcat serbe më 31 maj vranë të gjithë anëtarët e familjes së Selatin Gërxhalitut nga fshati Studime i Vushtrrisë, duke mos kursyer as fëmijën 5 vjeç.

Në nderim të kujtimit për të rënët, familjarë, përfaqësues institucional dhe politik  dhe drejtues të organizatave të luftës, kanë marrë pjesë në Akademinë e organizuar në Vushtrri dhe në homazhet në varrezat e martirëve në Studime të Vushtrrisë.

Në fjalën e tij në akademinë përkujtimore për të rënët, kryetari i Komunës së Vushtrrisë, Xhafer Tahiri tha se sot qyteti i Vushtrrisë i përkujton me mall dhe krenari 13 anëtarët e familjes Gërxhaliu që u bënë themel i Lirisë së Kosovës. 

Duke bërë thirrje publike për institucionet e Drejtësisë vendore dhe atyre ndërkombëtare që të japin drejtësi për të rënët e familjes Gërxhaliu, kryetari  Tahiri tha se liria e Kosovës është ujitur me gjakun edhe të fëmijëve e anëtarëve tjerë të familjes së Selatin Gërxhaliut.

“Liria dhe Pavarësia jonë nuk do të janë të plota deri atëherë kur kryesit e këtyre krimeve, si dhe bartësit e funksioneve publike të asaj kohe në Vushtrri, të dalin para drejtësisë”, ka thënë Tahiri. 

Edhe pse u bënë dy dekada dhe ka dëshmi të forta për krimin që forcat serbe kryen me 31 maj në Studime, ende askush nuk është dal para drejtësisë.


MË SHUME NGA Kosovë