Në Francë krijohen kapelat me përmasa të mëdha që ruajnë distancën sociale
Sharr Travel

Në Francë krijohen kapelat me përmasa të mëdha që ruajnë distancën sociale

Kapelat mund të jenë edhe një zgjidhje interesante për të siguruar që personat t’i respektojnë distancat mes njëri-tjetrit në kohë të rrezikut pandemik. Këtë mënyrë po përdor një galeri franceze për vizitorët e saj.

Një galeri arti në Francë po përdor imagjinatën por edhe referenca historike për të aplikuar masa të distancimit fizik prej pandemisë.

Artistët e galerisë “59 Rivoli” janë frymëzuar nga dinastitë e lashta kineze për të krijuar kapela me përmasa të mëdha që shmangin kontaktet e afërta mes vizitorëve nga rreziku i coronavirusit.

Kapelat shumëngjyrëshe përshkohen nga një shufër që siguron largësinë rreth 1 metër mes personave.

Mbulesa të tilla për kokën thuhet se përdoreshin nga zyrtarët e dinastive kineze deri në shekullin e 13-të.

“Me sa duket, zyrtarët më shumë por edhe perandorët mbanin nga këto kapela për të penguar pëshpërimat apo të folurit pa u dëgjuar nga të tjerët. Pra edhe atëherë kishte një nocion distancimi social, të mosafrimit pranë”.

Artisti Dominik Puzol thotë se prodhimi i 10 kapelave i ka marrë atij 30 orë kohë.

Kapelat synojnë në parim mbrojtjen nga kovidi, por kanë edhe mesazhe më sociale, siç është mbrojtja nga paragjykimi e konkretizuar me një kapelë me ngjyrat e ylberit për kauzën LGBT.

“Roli i artistëve në kohë të tilla është të krijojnë flluska imagjinate dhe kënaqësie. Në këtë moment të gjithë janë të frymëzuar për jetën, për të ndenjur në tarracat e kafeneve, për të folur, për të qeshur, por me maska kjo bëhet e vështirë. Ndaj arti ndihmon që t’i bëjë bashkë njerëzit”.

Muzetë e vegjël francezë kanë hapur dyert për vizitorët nga mesi i muajit të kaluar, ndërsa ai kryesori i kryeqytetit, muzeu i Luvrit, planifikon rihapjen në fillimin e korrikut.