Avionët me Pokemon “pushtojnë” qiellin japonez
“Solaseed Airlines”, një kompani lokale, me bazë në ishullin japonez Kyushu, inauguroi një avion të pikturuar me karakterin vizatimor të Pokemon. Fluturimi i tij i parë ishte nga Miyazaki City në aeroportin Haneda të Tokios.
Këta avionë, që do të qarkullojnë së paku deri në fund të vitit 2021, janë pjesë e një bashkëpunimi midis The Pokémon Company (e cila zotëron dhe licencon personazhet) dhe rajoneve të ndryshme të Japonisë.
Miyazaki, në bregun lindor të Kyushu, është rajoni i tetë që bashkohet me këtë nismë, ku secili prej tyre ka një Pokemon të personalizuar me një detaj karakteristik.
Edhe pjesa e brendshme e avionit është e mbushur me piktura të karakterit vizatimor. Ato mund t’i shohësh te sediljet e udhëtarëve si dhe te stilolapsat ose broshurat që jepen në nisje të udhëtimit.
Avionët e pikturuar me karaktere të njohura janë një traditë argëtuese në industrinë e aviacionit. Personazhet Jake, Finn dhe Princess Bubblegum nga shfaqja e njohur televizive “Adventure Time” janë shfaqur në avionët e quajtur Cartoon Network në Thai Smile, një linjë rajonale në Tajlandë.
























