Studiuesit danezë zbulojnë tokën më veriore në bot
BKT
   Kuriozitete

Studiuesit danezë zbulojnë tokën më veriore në bot

Shkencëtarët kanë zbuluar atë që besohet të jetë toka më veriore në botë, një ishull ende i paemërtuar në veri të Grenlandës, që së shpejti mund të “gëlltitet” nga ujërat e detit.

Studiuesit nisën ekspeditën në muajin korrik dhe fillimisht menduan se kishin arritur në Oodaaq, deri më tani ishulli më verior në planet.

"Ne menduam se ishte një gabim I GPS-it, i cili na kishte bërë të besojmë se ishim duke qëndruar në ishullin Oodaaq," tha kreu i misionit, Morten Rasch nga departamenti i gjeoshkencave dhe menaxhimit të burimeve natyrore të Universitetit të Kopenhagenit.

"Në realitet, ne kishim zbuluar një ishull të ri më në veri, një zbulim që vetëm pak zgjeron mbretërinë" e Danimarkës, shtoi ai.

Ishulli i ri është 780 metra në veri të Oodaaq. Por është vetëm 30 deri në 60 metra mbi nivelin e detit, dhe Rasch tha se mund të jetë një "ishull jetëshkurtër".

"Askush nuk e di sa kohë do të mbetet. Në parim, ai mund të zhduket sapo të godasë një stuhi e re e fuqishme."

Territori autonom danez i Grenlandës ka zënë titujt e gazetave në vitet e fundit, veçanërisht në vitin 2019 kur ish -presidenti amerikan Donald Trump tha se donte të blinte territorin e Arktikut.

Propozimi, i përshkruar si "absurd" nga qeveria daneze, shkaktoi një përplasje diplomatike, por gjithashtu sinjalizoi interesin e përtërirë amerikan në rajon.