Kosova e Shqipëria me marrëveshje për shkëmbimin e përvojave për burgje
V.Thaçi/RTKlive
Zëvendësuesi i drejtorit të përgjithshëm të Shërbimit Korrektues të Kosovës, Sami Gashi së bashku me zëvendësuesin e drejtorit të përgjithshëm të Shërbimit Sprovues të Kosovës, Arsim Tahiri, pritën në takim delegacionin nga Shqipëria të përbërë nga drejtori i përgjithshëm i Burgjeve, Admir Abrija, drejtori i Shërbimit Sprovues, Ervin Hoxha, drejtori Policisë së Burgjeve, Paulin Rajta dhe zëvendësdrejtori i Burgjeve, Femi Sufaj.
Gjatë takimit u shkëmbyen idetë dhe përvojat më të mira në shumë fusha, si në fushën e trajtimit të të burgosurve, fushën e trajnimeve të stafit, fushën e kontrollit të brendshëm dhe në shumë fusha të tjera me rëndësi për të dy palët, njofton në komunikatën për media Shërbimi Korrektues i Kosovës.
Sipas komunikatës, pas takimit ata vizituan Qendrën e Paraburgimit në Prishtinë, Qendrën Operative, Njësinë e Intelegjecës dhe Qendrën e Vlerësimit, ku u dakorduan edhe për nënshkrimin e një marrëveshje bashkëpunimi, në mënyrë që në të ardhmen të realizohen vizita të ndërsjella ekspertësh dhe shkëmbimi i përvojave më të mira për të dyja vendet.























