Në Shtime filluan punimet për rehabilitimin e dy akseve rrugore
Driton Ramadani/RTK
Filloi rehabilitimi i disa akseve rrugore në Shtime. I pranishëm ishte edhe ministri i Mjedisit e Infrastrukturës, Liburn Aliu. Punimet pritet të përfundojnë brenda 120 ditësh.
Rruga tranzitore nga hyrja e Shtimes për në fshatin Belicë është në gjendje shumë të keqe.
“Kaloj çdo ditë kësaj rruge është rruga katastrofë e keqe po e shihni edhe vet na shkakton shumë defekte në kamion edhe është mirë të rregullohet sa më shpejtë”, ka thënë Beqir Rusolli -vozitës.
Vozitësit shpresojnë që sa më parë kjo dhe rrugët e tjera të rregullohen. E kjo, nisi të enjten në fillimin e investimit në rrugën që lidh Shtimen me Lipjanin, i pranishëm ishte edhe ministri Liburn Aliu.
“Pra kemi filluar rehabilitimin nga Shtime në Lipjan dhe transitin i cili ka qenë në gjendje dhe është në gjendje të rënd e që urojmë që ta rehabilitojmë sa më shpejtë në mënyrë që qytetarët dhe biznes të kenë mundësi qarkullimi të lirshëm pa e pengu jetën normale brenda zonave urbane ”, ka thënë Liburn ALiu- Ministër i Mjedisit, Planifikimit Hapësinor dhe Infrastrukturë.
Drejtuesit e komunës së Shtimes, realizimin e këtij projekti e quajtën shumë të rëndësishëm, sidomos për bizneset.
“Ju e dini që në zonën e malësisë janë mbi 12 operator gurëthyes dhe kompani ndërtimore krejt funksionimin e tyre krejt transportin e kryen nëpërmjet këtij transiti por edhe nëpër mes rrugës Shtime- Lipjan”, ka thënë Qemajl Aliu , Kryetar i Komunës së Shtimes.
Rregullimi I këtij aksi rrugor, pritet të përfundojë në afat prej 120 ditësh.























