Qytetarët e Fushë-Kosovës ankohen për rrugët e dëmtuara|Video
Fatos Cervadiku / RTK
Banorët e Fushë-Kosovës po përballen me problemin e rrugëve të cilat janë me gropa dhe vështirë të kalueshme.
Rrugët “Hajrullah Zymi”, “Hamdi Grajqevci” dhe “EnverMaloku”, janë kthyer në shqetësim për qytetarët e kësaj komune.
Problemi me operatorët ka bërë që Komuna të vonohet në sanimin e rrugëve deri në zgjedhjen e një operatori të ri në fund të korrikut.
Qytetarët e kësaj komune thonë se gati çdo rrugë është e dëmtuar dhe me gropa ose në fillim ose në mbarim. Ata po ashtu tregojnë se ka rrugë që është rregulluar para 7-8 muajve, por që pas dy muajve prapë janë rritur gropat.
“Pastërtia dhe mirëmbajtja e rrugëve janë tmerr në Fushë-Kosovë. Nuk besoj që ka një komunë tjetër që mundet me u krahasua me këtu”, thotë qytetari.
Në Komunën e Fushë-Kosovës arsyetohen për moszgjidhje të një kompanie që do ta bëjë sanimin e rrugëve.
Zëdhënësi i Komunës, Ali Topalli tregoi se shumë shpejt pritet të nisë puna në rregullimin e rrugëve të dëmtuara.
"Kemi filluar procedurat dhe janë bërë procedurat më 27 të këtij muaji dhe hapja e ofertave do të bëhet më datën 17 të këtij muaji. Do të caktohet operatori i ri dhe sigurisht se do të fillojnë punimet shumë shpejt”, ka thënë Topalli.
Po ashtu Topalli tha se komuna ka ndarë rreth 125 mijë euro për sanim të rrugëve.























