Ka nisur regjistrimi i popullsisë në Gjakovë|Video
Islam Haxhiu /RTK
Edhe në komunën e Gjakovës ka nisur procesi i regjistrimit të popullsisë dhe ekonomive familjare.
Përfshirja e dëmeve të luftës në pyetësorin e regjistrimit të popullsisë e rrit edhe më shumë rëndësinë e këtij projekti nacional, thonë qytetarët e Gjakovës.
"Shënimet të cilat do të grumbullohen do të jenë të mirëseardhura për ndërtimin e politikave të vendit, për hartimin gjegjësisht planifikimin e buxhetit dhe financave për investime, në anën tjetër këto shënime që përfshijnë edhe vendbanimin, shkollimin edhe punësimin do të jenë të mirëseardhura për përmirësimin e mirëqenies së qytetarëve dhe në anën tjetër dalim shumë ma serioz para investitorëve të huaj dhe kapitalit të jashtëm", tha Ruzhdi Sefa nga Shoqata e Intelektualëve "Jakova".
"Më vjen shumë mirë që në regjistrimin e popullsisë janë futur edhe dëmet e luftës, mirëpo për mua është me rendësi edhe futja e përkatësisë fetare. Shpresoj se kjo do të jetë shumë e rëndësishme që populli ynë ka për ta kuptuar se sa esenciale është kjo", tha Engjëll Lleshi.
E, në anën tjetër, zyrtarët e Agjencisë së Statistikave në Gjakovë nuk pranuan të flasin për procesin e regjistrimit, që nisi sot dhe do të përfundojë më 17 maj të këtij viti.
Ndryshe, në regjistrimin e fundit të popullsisë në komunën e Gjakovës janë regjistruar 94.556 banorë.























