200 tabela digjitale për 7 shkolla të kryeqytetit
BKT
Kosovë

200 tabela digjitale për 7 shkolla të kryeqytetit

B. H. | RTKlive

Komuna e Prishtinës ka nisur një hap të rëndësishëm drejt digjitalizimit të shkollave, duke instaluar 200 tabela digjitale në shtatë shkolla të kryeqytetit.

Sipas njoftimit nga komuna, projekti, i cili u prezantua në shkollën fillore “Dardania”, është duke u realizuar me ritme të shpejta falë bashkëfinancimit dhe përkrahjes teknike nga UNDP.

“Gjysma e klasave tashmë është digjitalizuar, ndërsa deri në fund të vitit synohet që të gjitha klasat të pajisen me sisteme digjitale, duke përfshirë panelet interaktive dhe qasje në platforma digjitale të kurrikulës shkollore. Ky zhvillim po ndihmon në lehtësimin e procesit të të nxënit dhe rritjen e ndërveprimit mes mësuesve dhe nxënësve”, thuhet në njoftim.

Tutje theksohet se përveç tabelave digjitale, projekti përfshin integrimin e inteligjencës artificiale në shkolla, duke e bërë Prishtinën ndër qytetet e para në rajon që implementon këtë teknologji në arsim.

“Inteligjenca artificiale do të ndihmojë mësimdhënësit në përgatitjen e materialeve mësimore dhe do të lehtësojë procesin e të nxënit për nxënësit. Një tjetër komponent kyç i këtij projekti është instalimi i sensorëve për monitorimin e cilësisë së ajrit në klasa, duke siguruar një ambient më të shëndetshëm për nxënësit dhe mësimdhënësit”, thuhet më tej në njoftimin e komunës.

Ky investim, sipas autoriteteve të kryeqytetit, shihet si një hap thelbësor në avancimin e sistemit arsimor të Prishtinës, duke vendosur bazat për një qasje më inovative dhe efikase ndaj edukimit në kryeqytet.


MË SHUME NGA Kosovë