Ndalohet importi i derrave dhe produkteve të tyre nga Kroacia
BKT
Kosovë

Ndalohet importi i derrave dhe produkteve të tyre nga Kroacia

V.Th / RTKLive

Agjencia e Ushqimit dhe Veterinarisë përmes një komunikate për media njofton se pas konfirmimit të pranisë së sëmundjes Mortaja Afrikane e Derrit në rajonin Osjecko Baranjska dhe Vukovarsko Srijemska të Kroacisë AUV ka vendosur ndalimin e përkohshëm të importit të derrave të gjallë, produkteve, nënprodukteve dhe materialit gjenetik të derrit nga Kroacia.

Masa hyn në fuqi nga data 23 korrik 2025 dhe ka për qëllim parandalimin e përhapjes së sëmundjes në Kosovë.

Autoritetet kufitare, përfshirë Policinë e Kosovës, Doganat dhe AUV-në, do të rrisin kontrollin në të gjitha pikat kufitare për të parandaluar futjen e mallrave të ndaluara në territorin e Republikës së Kosovës.

Aktualisht nuk ka raste të dyshuara të sëmundjes në ferma, ndërsa situata monitorohet vazhdimisht nga inspektorët veterinarë të AUV-së dhe praktikat private veterinare, të cilët janë aktivë në terren për të parandaluar përhapjen e sëmundjeve. Në rajon janë aktive disa sëmundje, por falë punës profesionale të AUV-së, situata në Kosovë është nën kontroll dhe nuk është regjistruar asnjë rast i dyshuar.

Mortaja Afrikane e Derrit (MAD) është një sëmundje virusale që prek vetëm derrat e butë dhe derrat e egër, ndërsa llojet e tjera të kafshëve nuk preken. Sëmundja përhapet lehtësisht përmes kontaktit mes kafshëve, pajisjeve, ushqimit dhe lëvizjeve të njerëzve nga fermat e infektuara në ato të shëndetshme. MAD shkakton ethe hemorragjike me letalitet të lartë deri në 100%. Kjo sëmundje ka ndikim ekonomik të madh dhe nuk transmetohet tek njerëzit.


MË SHUME NGA Kosovë