Blerta Hasani, punëtore e dalluar: Mësimdhënia është mision
Shqipe Gashi|RTKlive
Mësimdhënësja e shkollës Shkolla Fillore dhe e Mesme e Ulët "Elena Gjika" në Prishtina, Blerta Hasani, është shpallur "Mësimdhënëse e Dalluar për vitin shkollor 2025–2026" në nivel komunal. Me këtë rast, ajo ishte e ftuar në programin e mëngjesit të Radio Televizioni i Kosovës (RTK), ku foli për këtë vlerësim dhe përkushtimin e saj në arsim.
“Shpallja si mësimdhënëse e dalluar është nder i madh dhe një ndjenjë shumë e veçantë. Jam mirënjohëse që ma kanë vlerësuar punën. Ky çmim është një inkurajim që unë të vazhdoj të punoj edhe më shumë dhe më mirë në këtë fushë në të ardhmen. Normalisht që mësimdhënia është një mision dhe kur punon me zemër e me përkushtim të madh, sukseset dhe rezultatet vijnë vetë”, u shpreh Hasani gjatë intervistës.
Ajo theksoi se është pjesë e kolektivit prej 83 mësimdhënësve të shkollës “Elena Gjika”, duke vlerësuar përkushtimin e secilit prej tyre.
“Jam në mesin e 83 mësimdhënësve të shkollës ‘Elena Gjika’ dhe të gjithë mësimdhënësit në shkollën tonë janë profesionistë që punojnë me përkushtim shumë të madh. Unë personalisht aty punoj përafërsisht prej dy dekadash. E dua profesionin tim dhe mundohem që çdo herë të bëj ndryshime për të mirë, gjithmonë në hap me kohën”, tha ajo.
Hasani nënvizoi se komisioni vlerësues ka marrë parasysh punën e saj shumëvjeçare, veçanërisht angazhimin gjatë periudhës së pandemisë, kur sistemi arsimor u përball me sfida të mëdha.
“Komisioni e ka marrë parasysh edhe punën që e kam bërë ndër vite, në veçanti atë gjatë kohës së pandemisë, kur vendi ynë ishte totalisht i mbyllur. Natyrisht më është vlerësuar edhe ana njerëzore në punën që e bëj me nxënës që kanë kerkesa specifike”, theksoi Hasani.























