Rrëshqitje dheu në rrugë, Rama pezullon inspektorët dhe kërkon hetim
BKT
Kosovë

Rrëshqitje dheu në rrugë, Rama pezullon inspektorët dhe kërkon hetim

Shkelzen Çoçaj|RTKlive

Kryetari i Komunës së Prishtinës, Përparim Rama, ka reaguar pas rrëshqitjes së dheut në rrugën “Don Shtjefen Kurti”, duke paralajmëruar masa të menjëhershme ndaj inspektorëve të përfshirë.

Rama njoftoi në Facebook se ka kërkuar pezullimin e menjëhershëm nga detyra të inspektorëve përgjegjës, deri në përfundim të hetimeve. Ai gjithashtu bëri të ditur se ekipet e Komunës dhe Policia janë në terren duke monitoruar situatën dhe sigurinë e banorëve.

Kryetari ka kërkuar që Prokuroria të nisë menjëherë hetimet, për të zbardhur shkaqet e rrëshqitjes dhe përgjegjësitë përkatëse. Një hetim i brendshëm administrativ do të shqyrtojë raportet e inspektimit, frekuencën e kontrolleve në terren dhe çdo mundësi të neglizhencës.

Një segment i rrugës “Don Shtjefën Kurti” në Prishtinë gjatë ditës është shembur plotësisht si pasojë e rrëshqitjes së dheut, duke shkaktuar bllokim të menjëhershëm të qarkullimit në këtë zonë.

Në vendin e ngjarjes kanë dalë menjëherë ekipet përkatëse, përfshirë Drejtorinë për Siguri dhe Emergjenca, Inspektoratin, KEDS-in, Ujësjellësin dhe Policinë, të cilat kanë ndërmarrë masa për sigurimin e zonës dhe parandalimin e rrezikut për qytetarët.

Autoritetet u kanë bërë thirrje qytetarëve që të shmangin këtë segment rrugor dhe të respektojnë udhëzimet e dhëna nga ekipet në terren.

Si pasojë e dëmtimeve të shkaktuara nga shembja, janë prekur edhe linjat e energjisë elektrike.

Operatori i Sistemit të Transmetimit dhe Tregut (KOSTT) ka njoftuar se një pjesë e konsumatorëve që furnizohen nga nënstacioni “Prishtina 6” kanë mbetur pa energji elektrike.

Sipas KOSTT-it, dëmtimet kanë ndikuar në rrjetin transmetues në nivelin 110 kV. Ekipet e tyre, në bashkëpunim me KEDS-in, ndodhen në terren dhe po punojnë intensivisht për sanimin e defekteve dhe rikthimin sa më të shpejtë të furnizimit me energji elektrike.

KOSTT ka kërkuar mirëkuptim nga qytetarët e prekur, ndërsa autoritetet vazhdojnë të monitorojnë situatën dhe të ndërmarrin veprime për stabilizimin e plotë të infrastrukturës së dëmtuar.


MË SHUME NGA Kosovë