Maratona “Prishtina 2026”, këto rrugë do të bllokohen të dielën
E.Hoti/RTKlive
Policia e Kosovës ka njoftuar se të dielën, do të ketë bllokime dhe kufizime të qarkullimit në disa rrugë në Prishtinë dhe Fushë-Kosovë, për shkak të organizimit të maratonës ndërkombëtare “Prishtina 2026”.
Sipas policisë, masat do të zbatohen nga ora 09:00 dhe do të jenë në fuqi deri në përfundim të maratonës. Në kuadër të këtij plani, do të ndërpritet qarkullimi i automjeteve në rrugën Prishtinë–Fushë-Kosovë, në drejtim të Pejës dhe anasjelltas, deri te nyja e kyçjes në autostradën “Ibrahim Rugova”.
Policia ka bërë të ditur se janë ndërmarrë të gjitha masat e nevojshme për garantimin e sigurisë së pjesëmarrësve në maratonë, si dhe për menaxhimin dhe orientimin e trafikut gjatë zhvillimit të garës.
Për të shmangur pengesat në komunikacion, drejtuesve të automjeteve u është kërkuar të përdorin rrugët alternative.
Rrugët alternative të rekomanduara janë:
Për ngasësit që udhëtojnë nga Peja në drejtim të Prishtinës: Sllatinë – fshati Magurë – Lipjan, më pas lidhja me rrugën nacionale Ferizaj–Prishtinë.
Për ata që udhëtojnë nga Peja dhe Fushë-Kosova: Sllatinë – Bardh i Vogël – fshati Kuzmin – Fushë-Kosovë.
Për ngasësit nga Prishtina ose Veterniku në drejtim të Pejës dhe Aeroportit: Prishtinë – Lipjan – Rufc i Ri – Poturoc – Magurë – Aeroport.
Për ngasësit nga Mitrovica në drejtim të Pejës ose Aeroportit: autostrada nga Mazgiti në drejtim të Shkupit, dalje në Lipjan dhe më pas Rufc i Ri – Poturoc – Magurë – Aeroport.
Ngasësit që udhëtojnë nga Mitrovica në drejtim të Ferizajt do të mund të qarkullojnë lirshëm në rrugën nacionale.
Ndërkohë, autobusët e transportit publik në relacionin Prishtinë–Fushë-Kosovë–Aeroport, si dhe në drejtim të Pejës, nuk duhet të qarkullojnë në segmentet e prekura gjatë kohës së garës, por të shfrytëzojnë rrugët alternative.
Policia e Kosovës ka kërkuar nga qytetarët mirëkuptim dhe respektim të udhëzimeve të zyrtarëve policorë, me qëllim që qarkullimi rrugor të menaxhohet sa më lehtë gjatë zhvillimit të maratonës.
Maratona "Prishtina 2026" do të transmetohet drejtpërdrejt në RTK.























