PSD mbështet grevat në Kosovë
F.Sertolli / RTKlive.com
Përmes një komunikata për media Partia Social Demokrate e Kosovës (PSD) vlerëson se Qeveria Kurti është e vetmja në historinë e Kosovës që haptazi neglizhon, përjashton dhe lufton sindikatat e punëtorëve.
“Ky pushtet që në opozitë protestonte bashkë me sindikatat, në pushtet është bërë armiku kryesor i tyre”, thuhet në komunikatë.
PSD vlerëson se zhvendosja ideologjike përkundër interesave të punëtorëve sjellë këso anomalie.
“Në krizat e njëpasnjëshme të cilat po i përjetojmë, humbësit e mëdhenj dhe të vazhdueshëm janë punëtorët e familjet e tyre. Qeveria ka rritur buxhetin, biznesi privat ka shtuar çmimet e fitimet, bankat po fitojnë miliona dividentë në kurriz të pagave të ulëta të punëtorëve”, thuhet në komunikatë.
Andaj, sipas PSD-së, greva është plotësisht legjitime edhe domosdoshmëri.
“ Me rritjen e çmimit të çdo produkti, me rritjen e çmimit të rrymës, me reduktimet që do të vazhdojnë të përkeqësohen gjatë dimrit për faj të mosveprimit të qeverisë, jetesa në Kosovë është vështirësuar shumë”.
Sipas PSD-së, punëtorët janë qytetarë të republikës.
“Mbi kurrizin e tyre po qëndron kriza e rritjes e çmimeve. Këta njerëz nuk kanë për borxh një qeveri që i neglizhon, i përbuzë, i shantazhon dhe kërcënon. Këta njerëz meritojnë dhe po kërkojnë të jetojnë dinjitetshëm”, përfundon komunikata e PSD-së.























