Në Mitrovicë, shkollat dhe administrata e komunës në grevë
BKT
Kosovë

Në Mitrovicë, shkollat dhe administrata e komunës në grevë

Asdren Agushi/RTK/M.Miftari/RTKlive

(E plotësuar)Zyrtarët komunalë në Mitrovicë janë në grevë prej datës 25 gusht dhe të gjitha shërbimet janë ndërprerë përveç rasteve urgjente në sektorin e gjendjes civile, ku kemi aktivizuar edhe një e-kioskë për t’ju afruar shërbime qytetarëve, të cilët kanë nevojë për udhëtime dhe kanë nevojë për shërbime urgjente.

Kështu u shpreh për Info Plus Gëzim Stavileci, drejtor i Administratës së Përgjithshme, në Mitrovicë, i cili shtoi se sa i përket listës së grevistëve, Qeveria e Kosovës ka kërkuar listën e grevistëve, ne iu kemi përgjigjur se lista duhet drejtuar Këshillit Grevist.

Tutje Stavileci bëri të ditur se në Komunën e Mitrovicës nuk janë ekzekutuar pagat dhe kjo ka shkaktuar pakënaqësi të madhe te zyrtarët komunalë, meqë shumica prej tyre janë kredimarrës, duke shtuar se  një padrejtësi e madhe u është bërë zyrtarëve komunalë, të cilët kanë qenë në pushim vjetor, gjegjësisht në pushim mjekësor.

Përveç kësaj, Stavileci tha se paga nuk u është ekzekutuar as stafit politik komunal.

Ai, më tej sqaroi se pavarësisht vendimit të Qeverisë së Kosovës për mosekzekutimin e pagave, punëtorët e administratës në Komunën ë Mitrovicës, si dhe arsimtarët,  janë të vendosur ta vazhdojnë grevën.

Lidhur me mënyrën e vazhdimit të grevës, Stavileci tha se kjo i përket Këshillit Grevist.

Edhe pse në grevë të gjithë punëtorët e administratës në Komunën e Mitrovicës janë në vendet e punës, duke përfshirë këtu edhe stafin politik, tha për Info Plus Gëzim Stavileci, drejtor i Administratës së Përgjithshme, në Mitrovicë.

(E plotësuar) Në Gjilan shkollat në grevë, administrata punon

Në Gjilan,  24 shkolla fillore, 8 të mesme dhe 4 çerdhe, tash e disa ditë kanë grevë.

Gazetari i RTK-së nga ky qytet raportoi në emisionin “Info Plus”  se në këtë komunë, në të gjitha shkollat ka grevë,  përkundër  mos ekzekutimit të pagave nga Ministria e Financave për shumë prej tyre.

Ndërkohë, përkundër kësaj, derisa në arsim ka grevë,  administrata në Gjilan nuk e ka përkrahur atë.  Në administratën komunale ka vazhduar puna si zakonisht.

Sikundër bëhet e ditur, nga gazetari i RTK-së Asdren Agushi, punëtorëve të administratës në Gjilan  ende nuk u kanë dalë pagat, ngase janë në listën e ndëshkimit të pagave.


MË SHUME NGA Kosovë