Mbrojtja kundërshton prokurorinë: Bota u ndihmoi të çlironin vendin
Jeton Musliu/RTKlive
Dhomat e Specializuara të Kosovës në Hagë, publikuan dosjen paraprake të mbrojtjes së Hashim Thaçit, Kadri Veselit, Jakup Krasniqit e Rexhep Selimit.
Në dosjen paraprake e cila përmban 82 faqe të mbrojtjes së Hashim Thaçit, shkruan se nëse UÇK-ja do të kishte vepruar në bazë të një plani kriminal për vrasjen, torturimin dhe abuzimin e civilëve, ajo nuk do të kishte pasur kurrë mbështetjen ndërkombëtare.
“Nuk do ta kishte kurrë mbështetjen e SHBA-së, Britanisë së Madhe, NATO-s, OSBE-së, Grupit të Kontaktit apo komunitetit më të gjerë ndërkombëtar”.
Në dosje shkruan se gazetarë, studiues, diplomatë, historianë dhe jurist, i kanë shqyrtuar nga afër këto ngjarje, atëherë si edhe gjatë dy dekadave të fundit.
“Nuk kishte asnjë plan të përbashkët kriminal të UÇK-së. Komuniteti ndërkombëtar nuk do ta kishte përkrahur kurrë”.
Mbrojtja e të akuzuarve deklaron se aktakuza bazohet në një keqinterpretim të pjesshëm dhe selektiv të ngjarjeve në fjalë.
Mbrojtja rikujton se tani është e qartë se shumë nga dokumentet në të cilat mbështetet Zyra e Prokurorit të Specializuar, erdhën nga organet qeveritare serbe.
Sipas mbrojtjes, janë të njëjtat organe që kanë një interes të veçantë në rezultatin e këtyre procedurave, e të cilat edhe u përpoqën të vrisnin Dick Martyn, me qëllim të fajësimit të shqiptarëve të Kosovës.
Për më tepër, mbrojtja e të akuzuarve rikujton se në narrativen e Zyrës së Prokurorit të Specializuar, mungon në tërësi fenomeni se 863 mijë shqiptarë të Kosovës u shndërruan në refugjatë, dhe 590 mijë persona ishin të zhvendosur brenda vendit.
“…Për të gjetur shtëpitë dhe jetët e tyre të shkatërruara dhe duke kërkuar ndëshkim për tmerrin e shkaktuar gjatë javëve, muajve dhe viteve nga shtypësit serbë”.
Mbrojtja deklaron se Thaçi, anëtarët e tjerë të UÇK-së dhe Qeverisë së Përkohshme të Kosovës nuk kishin asnjë shtysë për të kryer krime kundër kundërshtarëve.
Hashim Thaçi, Kadri Veseli, Jakup Krasniqi e Rexhep Selimi, po përballen me 10 akuza nga Prokuroria e Specializuar e Hagës.
Më 5 nëntor janë bërë dy vite prej që Thaçi, Veseli, Selimi e Krasniqi janë arrestuar nga hetuesit e Speciales. Deri tash, është refuzuar çdo kërkesë për mbrojtje në liri.
Për më shumë mund të lexoni dosjen e plotë:























