Spence: UN ka gatishmëri t’i ndihmoj të prekurit nga vërshimet
Foto: MPB
Kosovë

Spence: UN ka gatishmëri t’i ndihmoj të prekurit nga vërshimet

M.Sh/RTKlive

Menjëherë pas fillimit të vërshimeve, Ministra e Punëve të Brendshme ka ngritur gatishmërinë shtetërore dhe ka koordinuar veprimet së bashku me agjencitë ekzekutive dhe komunat, që fillimisht të evakuojnë të gjithë banorët dhe të mos kemi viktima në njerëz.

Kështu ka deklaruar ministri i Punëve të Brendshme, Xhelal Sveçla gjat një takimi që ka zhvilluar me koordinatoren e Kombeve të Bashkuara për Zhvillim në Kosovë, Arnhild Spence, ku diskutuan për gjendjen e përgjithshme pas vërshimeve që ndodhën në Kosovë.

Me këtë rast, ministri Sveçla, e njoftoi Spence për gjendjen e përgjithshme e cila është për momentin në komunat ku ka pasur vërshime më të mëdha dhe veprimet e ndërmarra nga institucionet qendrore dhe lokale të Republikës së Kosovës.

Ai theksoi se fatmirësisht nuk ka pasur viktima në njerëz, megjithatë theksoi se dëmet janë shumë të mëdha.

Ministri Sveçla theksoi se në kuadër të Qendrës Operative të Ministrisë së Punëve të Brendshme po vijon koordinimi i intervenimeve në të gjithë territorin e Republikës së Kosovës. Po ashtu po bëhet sigurimi i kërkesave të pranuara nga Shtabet Emergjente të komunave.

Ndërsa koordinatorja Spence e falënderoi ministrin Sveçla për rezymenë e përgjithshme për situatën pas vërshimeve dhe vuri në pah se UN ka gatishmëri që të ndihmojë familjet dhe qytetarët që janë prekur nga vërshimet.

“Ditëve në vijim do të vazhdojë koordinimi me Zyrën e Kombeve të Bashkuara në Kosovë dhe agjencitë e saj, në mënyrë që të realizohen kërkesat dhe nevojat e pranuara nga komunat dhe nga qytetarët”, thuhet në njoftimin e MPB-së .


MË SHUME NGA Kosovë