KRU “Prishtina” në hall me kyçjet ilegale, paralajmëron aksion të madh
J.M/RTKlive
Kompania Rajonale e Ujësjellësit “Prishtina” ka paralajmëruar për shkyçje nga furnizimi me ujë të pijshëm, të gjithë qytetarët që kyçjen e kanë bërë ilegalisht.
KRU “Prishtina” deklaron se furnizimi me ujë të pijshëm po rrezikohet gjithnjë e më shumë nga kyçjet e paautorizuara, nga ata konsumatorë që furnizohen me ujë duke shfrytëzuar alternativa ilegale.
“Andaj, sot e tutje do jemi pa kompromis ndaj atyre që me vite marrin ujë pa paguar për shërbime të ujit, e aq më keq kur sot kemi blloqe banesore që as nuk janë regjistruar edhe pas dhjetëra vërejtjeve që u kemi bërë”, njofton KRU “Prishtina”.
“Nuk ka ujë të pijshëm, pa paguar faturat e ujit dhe as për ata që kanë shfrytëzuar alternativa ilegale”.
KRU “Prishtina” deklaron se nga sot, do të ketë aksione të papara deri më tani.
Gjithashtu, disa herë, kjo kompani u ka bërë thirrje qytetarëve që të paguajnë për ujin e shpenzuar. Vlera e borgjeve që konsumatorët i kanë kësaj kompanie arrin milonat.























