Komuna e Drenasit përzgjidhet partner i ri i ReLOaD3
V.Th / RTKLive
Komuna e Drenasit zyrtarisht është përzgjedhur si partner i ri i Programit Rajonal për Demokracinë Lokale në Ballkanin Perëndimor 3 – ReLOaD3 në Kosovë, një projekt i financuar nga Bashkimi Evropian dhe i zbatuar nga Programi për Zhvillim i Kombeve të Bashkuara (UNDP).
Në njoftimin e Komunës thuhet se përzgjedhja e Komunës së Drenasit në mesin e një numri të kufizuar të komunave pjesëmarrëse është dëshmi e angazhimit të pandërprerë të udhëheqjes komunale për transparencë dhe pjesëmarrje qytetare.
Kryetari i Komunës, Ramiz Lladrovci, e ka cilësuar këtë përzgjedhje si një arritje të rëndësishme për komunën:
"Pjesëmarrja në ReLOaD3 është dëshmi e përkushtimit tonë për një qeverisje transparente, gjithëpërfshirëse dhe të hapur ndaj qytetarëve. Ky program do të sjellë përfitime të prekshme për komunitetin tonë dhe do të fuqizojë rolin e shoqërisë civile në vendimmarrje."
Përmes ReLOaD3, Komuna e Drenasit do të fokusohet në:
Fuqizimin e bashkëpunimit me organizatat e shoqërisë civile
Nxitjen e pjesëmarrjes aktive të qytetarëve, veçanërisht të rinjve
Ndërtimin e kapaciteteve të administratës komunale dhe sektorit joqeveritar
Përmirësimin e mjedisit ligjor dhe financiar për OJQ-të
Programi pritet të kontribuojë në rritjen e transparencës institucionale, llogaridhënies dhe zhvillimit të qëndrueshëm lokal, duke u fokusuar në përmirësimin e jetës së qytetarëve përmes qasjes së bashkëpunimit dhe gjithëpërfshirjes.























