Inspektorët gjobisin dy kompani pas ndotjes së rrugëve me beton në Gjilan
E.Hoti/RTKlive
Inspektorët e Komunës së Gjilanit kanë shqiptuar gjoba ndaj dy subjekteve afariste, kamionët e të cilave kanë ndotur rrugët me beton, pas ankesave të paraqitura nga qytetarët.
Sipas Drejtorisë së Inspekcionit, veprimet janë ndërmarrë pas verifikimit të ankesave, ku është konstatuar se automjetet e këtyre kompanive kanë shkaktuar ndotje në hapësirat publike duke lënë mbetje betoni në rrugë.
Nga kjo drejtori u bë thirrje për të gjithë shoferët dhe operatorët ekonomikë që të respektojnë detyrimet ligjore dhe të tregojnë kujdes më të madh për ruajtjen e mjedisit dhe pastërtisë publike.
“Rrugët dhe hapësirat publike janë pasuri e përbashkët dhe mirëmbajtja e tyre është përgjegjësi e secilit prej nesh”, thuhet në njoftimin e inspektorëve komunalë.
Drejtoria e Inspekcionit ka bërë të ditur se inspektorët vazhdojnë të jenë në terren dhe se do të ndërmerren masa ndëshkuese ndaj të gjithë atyre që ndotin mjedisin dhe cenojnë pastërtinë publike.























