Prekazi, vendi ku buron liria
BKT
Kosovë

Prekazi, vendi ku buron liria

107 vjetori i Pavarësisë së Shqipërisë dhe ditëlindja e komandantit legjendar të Ushtrisë Çlirimtare të Kosovës, Adem Jashari, kanë bërë që shumë qytetarë të vizitojnë kompleksin memorial "Adem Jashari" në Prekaz të Skenderajt.

Këtë vend qytetarët e quajnë të shenjtë, ndërsa thonë se festa e Flamurit këtë vit është shndërruar në dhimbje pas tragjedisë që ndodhi në Shqipëri, e cila u godit nga tërmeti që shënojë edhe shumë viktima.

Për qytetarin nga Rahoveci, Ferit Muharremi, Prekazi është vendi ku duhet të përkulen të gjithë, pasi sipas tij, është vendi nga buron liria e popullit të Kosovës.

Nga Gjilani për të bërë homazhe në kompleksin memorial "Adem Jashari", kishte ardhur Ekrem Kryeziu, i cili thotë se ky vend është vendi i lirisë së shtetit të Kosovës.

Për homazhe pranë varrit të komandantit Adem Jashari dhe familjes së tij, kishte ardhur të bënte edhe Hetem Ferizi, i cili jeton në Gjermani.

Ai thotë se ky vend duhet të vizitohet çdoherë, në mënyrë që gjithmonë të kujtohet sakrifica e familjes Jashari për lirinë e Kosovës.

Së bashku me familjen e tij kompleksin memorial e ka vizituar edhe Blerim Foniqi, e i cili thotë se Prekazi është historia e gjithë popullit shqiptar.

Sot bëhen 107 vjet nga shpallja e pavarësisë së Shqipërisë, ndërsa 28 nëntori shënon edhe ditëlindjen e komandantit legjendar të UCK-së Adem Jashari.


MË SHUME NGA Kosovë