Atentati ndaj prokurorit Arjan Ndoja, SPAK mbyll hetimet paraprake
BKT
Kronika

Atentati ndaj prokurorit Arjan Ndoja, SPAK mbyll hetimet paraprake

Prokuroria e Posaçme Kundër Korrupsionit dhe Krimit të Organizuar (SPAK) ka përfunduar hetimet paraprake dhe ka çuar për gjykim dosjen për atentatin e kryer ndaj prokurorit Arjan Ndoja në nëntor të 2019.

Personat, të cilët akuzohen për këtë ngjarje të rëndë, ku mbeti i vdekur shoferi i prokurorit Arjan Ndoja, Andi Maloku, janë Redjan Rraja dhe Ariol Halilaj.

Ata akuzohen për pesë vepra penale si; vrasja e funksionarëve publikë, vrasja në rrethana të tjera cilësuese, mbajtja e armëve pa leje, vjedhje dhe për grup të strukturuar kriminal.

Atentati ndaj prokurorit Arjan Ndoja u regjistrua më 1 nëntor të 2019 në autostradën Durrës-Tiranë, në afërsi të mbikalimit të Shkozetit.

Personat e mësipërm, të cilët akuzohen për ngjarjen dyshohet se qëlluan më armë zjarri në drejtim të automjetit me të cilin udhëtonin Andi Maloku, Arjan Ndoja dhe Aleksandër Laho, ku për pasojë  drejtuesi i mjetit, Andi Maloku humbi jetën dhe dy të tjerët mbetën të plagosur.

Prokuroria e Posaçme Kundër Korrupsionit dhe Krimit të Organizuar thotë se hetimet janë në proces e sipër për të identifikuar persona të tjerë, të cilët mund të jenë përfshirë në këtë ngjarje, e cila la pas një të vdekur dhe dy të plagosur.


MË SHUME NGA Kronika