Vajza e aksidentuar në Fushë Kosovë, në gjendje të rëndë (E plotësuar)
Jeton Musliu / RTKlive.com
Për gjendjen shëndetësore të të aksidentuarës sot në magjistralen Prishtinë-Fushë Kosovë, RTK është interesuar të mësojë edhe nga mjekët në Qendrën klinike Universitare të Kosovës.
"Para një ore është pranuar një rast i lënduar në aksident trafiku. Ajo është 20 vjeçare”, tha Naser Syla, drejtor i Qendrës Emergjente në QKUK.
“Ajo ka lëndime të rënda trupore nga aksidenti në komunikacion”, tha Syla për RTK-në.
Sipas tij, deri tani, pacientes i janë bërë analizat dhe ekzaminimet e nevojshme në Qendrën Emergjente.
“Gjendja e pacientes është shumë e rëndë dhe e njëjta është në rrezik të lartë për jetë”.
Sipas rezultateve dhe analizave, mjeku deklaron se mjekimi i pacientes do të vazhdojë në mjekim intensiv.
Ora 12:30
Policia e Kosovës e konfirmoi më vonë gjatë ditës aksidentin e rëndë të trafikut, kur një automjet me shpejtësi, goditi një person të gjinisë femërore, në magjistralen Prishtinë-Fushë Kosovë.
“Rreth orës 11:00, në rrugën Prishtinë – Fushë Kosovë, ka ndodhur një aksident trafiku ku është përfshirë një automjet në lëvizje dhe një këmbësore”, deklaron policia.
“Si pasojë e aksidentit, lëndime trupore ka pësuar këmbësorja e cila është dërguar për tretman mjekësor”
Polica konfirmon se me rastin po merret njësiti i trafikut, të cilët përveç që po hetojnë rrethanat e këtij aksidenti, janë duke punuar në identifikimin e personit.
“Ngasësi i automjetit të përfshirë në aksident, ka ikur nga vendi i ngjarjes”, deklaroi policia.
Më herët gjatë ditës, RTKlive.com, raportoi për këtë aksident.
Ora 11:20
Një aksident i rëndë komunikacioni ndodhi në magjistralen Prishtinë-Fushë Kosovë, në mëngjesin e së dielës.
Një vajzë rreth të 20-tave, është goditur rëndë nga një automjet që lëvizte me shpejtësi nga drejtimi i Prishtinës në drejtim të Fushë Kosovës.
Aksidenti ndodhi rreth orës 11:00, pak para mbërritjes tek rrethrrotullimi i dytë në këtë magjistrale.
Qytetari G.H i cili ka rastisur në vendin e ngjarjes, ka dërguar fotografitë për RTKlive.com, ku vajza e goditur nga automjeti , shihet e shtrirë në asfalt.
Ajo ishte duke kaluar rrugën nga ana e djathtë në të majtën, dhe në atë vend nuk ka vendkalim kurse rruga përbëhet gjithsej nga gjashtë korsi .
Edhe pse vozitësi ka shkaktuar një aksident, qytetari i cili ishte në vendin e ngjarjes, rrëfen për RTKlive.com se ai është larguar me shpejtësi, pa u ndalur që t’i japë ndihmën e parë të aksidentuarës.
Policia ka dalë në vendin e ngjarjes kurse ndihma e shpejtë ka mbërritur pas më shumë se 20 minutave.
Ndërkohë, sipas Policisë së Kosovës, vetëm në 24 orët e fundit, kanë ndodhur 15 aksidente me të lënduar, kurse janë shqiptuar 1.630 gjoba për ngasësit në trafik.
























