Policia e Kosovës arreston tre persona për kontrabandim me migratë
Fadil Sertolli/ RTKlive
Policia e Kosovës përmes një komunikate ka njoftuar se ka arrestuar tre persona tëq dyshuar për kontrabandë me migrant.
Të arrestuarit, sipas Policisë janë dy meshkuj kosovarë dhe një mashkull palestinez, të cilët me urdhër të prokurorit janë dërguar në mbajtje për 48 orë, ndërsa viktimat janë dërguar në njësinë për migrim dhe të huaj për procedurat e mëtutjeshme.
“Me datën 14.09.2022 rreth orës 21:20 njësia policore nga policia kufitare Vërmicë - Drejtoria Rajonale Gjakovë, gjatë zbatimit të planit operativ të lartcekur në fshatin Shkozë ka ndaluar dy automjete të dyshuara taksi me targa vendore me drejtues dy të dyshuarit meshkuj kosovarë, të cilat ishin në lëvizje nga drejtimi Vërmicë – Prizren”, thuhet në komunikatë.
Po ashtu bëhet e ditur se gjatë kontrollit të realizuar ndaj dy automjeteve janë hasur shtatë viktima shtetas egjiptianë dhe një shtetas palestinez, i cili dyshohet se ka qenë i përfshirë në kontrabandimin e tyre.
Ndryshe Policia e Kosovës, me qëllim të parandalimit të aktiviteteve kriminale dhe migrimit ilegal në pikat kufitare, ka hartuar planin operativ “Migrim i parregullt”, referuar të cilit janë shtuar patrullimet dhe vëzhgimet në terren për identifikim dhe arrestim të personave të dyshuar, kryes të veprave penale.























