Në dy raste të ndara, Policia arreston pesë të dyshuar
Kronika

Në dy raste të ndara, Policia arreston pesë të dyshuar

Fadil Sertolli / RTKlive

Policia e Kosovës, përmes një njoftimi për media ka bërë të ditur se në dy raste të ndara ka arrestuar pesë persona të dyshuar për kryerje të veprave të ndryshme penale.

Për rastin e parë, thuhet se hetuesit policorë nga Njësia Rajonale për Hetimin e Krimeve Ekonomike dhe Korrupsionit (NjRHKEK) – Prishtinë, në bashkëpunim me Prokurorinë Themelore në Prishtinë, kanë trajtuar një rast ku të përfshirë kanë qenë zyrtarë nga Komuna e Obiliqit dhe një qytetar.

“Dy të dyshuarit: A. B. dhe N.K.Sh.(zyrtarë komunal), dyshohet se janë përfshirë në veprën penale: ‘keqpërdorim i pozitës apo autoritetit zyrtar’. Kurse, i dyshuari R.H., dyshohet se ka kryer veprat penale: ‘legalizim i përmbajtjes së rreme’ , ‘falsifikim i dokumenteve’ dhe ‘mashtrim’. Rasti është trajtuar nën dyshimin se një pronë është tjetërsuar në mënyrë të kundërligjshme”, thuhet në njoftimin policisë.

Tutje, thuhet në njoftim, se të dyshuarit janë intervistuar dhe me aktvendim nga prokurori,  R.H., është dërguar në ndalim policor deri në 48 orë, kurse ndaj dy të dyshuarve tjerë rasti do të vazhdohet në procedurë të rregullt.

Ndërkaq, për rastin e dytë vazhdon njoftimi, se Drejtoria për Hetimin e Krimeve Ekonomike dhe Korrupsionit-Sektori i Hetimeve të Korrupsionit, më 08.12.2022 në vazhdën e zhvillimit të hetimeve në rastin e njohur si ‘subvencionet’, me autorizim nga Prokuroria Speciale e Republikës se Kosovës, ka intervistuar në cilësinë e të dyshuarve dy persona: V.P. dhe P.B.,nën dyshimin e kryerjes së veprave penale ‘marrja e ryshfetit’ dhe‘keqpërdorim i pozitës dhe autoritetit zyrtar’

“Pas intervistimit, i dyshuari V.P. me aktvendim të prokurorit ndalohet për 48 orë, kurse i dyshuari P.B., lirohet dhe lënda ndaj tij do të trajtohet në procedurë të rregullt”, thuhet në njoftimin Polcisë së Kosovës.

 

 


MË SHUME NGA Kronika