Iu bashkua ISIS-it, dënohet me 4 vjet e 8 muaj burg
J.Musliu/RTKlive
Gjykata Themelore në Prishtinë dënoi me gati pesë vjet burg të akuzuarin H.S, për veprën penale “Organizimi dhe pjesëmarrja në grup terrorist”.
Departamenti Special i kësaj gjykate deklaroi se i akuzuari H.S është shpallur fajtor dhe është dënuar me dënim me burgim në kohëzgjatje prej 4 (katër) vite e 8 (tetë) muaj.
“Në këtë dënim, llogaritet koha e kaluar në paraburgim nga data 01 gusht 2018 e tutje, por jo më shumë se dënimi i shqiptuar në aktgjykim”, shkruan në aktvendim.
Të akuzuarit H.S i është vazhduar paraburgimi deri në plotfuqishmërinë e aktgjykimit, por jo më shumë se dënimi i shqiptuar me burgim.
Sipas aktakuzës, i akuzuari me datë 23 nëntor 2015, me paramendim dhe me dashje si dhe me përgatitje paraprake, së bashku me bashkëshorten e tij dhe vajzën e mitur, kishte lëshuar territorin e Republikës së Kosovës, përmes Aeroportit Ndërkombëtar ‘Adem Jashari’ në Prishtinë.
Ai kishte udhëtuar për në qytetin e Stambollit të Republikës së Turqisë dhe përmes lidhjeve të caktuara kishte depërtuar në Siri, me qëllim që t’i bashkëngjitet organizatës terroriste ISIS, e cila në këto vende ka qenë duke u luftuar.
“Është angazhuar si pjesëtar i ISIS-it, si administrator në Byronë e ushtarëve të plagosur nën administrimin e ISIS-it, është financuar nga ISIS me shumën e të hollave prej nga 100 dollarë amerikanë në muaj, duke bashkëpunuar edhe me eprorë dhe luftëtarë të ISIS-it, si Lavdrim Muhaxheri, etj”, shkruan në aktakuzë.
“Më pastaj është dorëzuar tek Forcat Demokratike Siriane, ku edhe me datë 28 maj 2022 është riatdhesuar në Republikën e Kosovës”, thekson Gjykata Themelore e Prishtinës.
Kjo e fundit ka njoftuar po ashtu se palët e pakënaqura kanë të drejtë ankese në Gjykatën e Apelit.























