Policia raporton për disa raste kriminale dhe persona të zhdukur në Kosovë
M.Shefkiu/RTKLive
Policia e Kosovës ka raportuar për një sërë incidentesh kriminale në rajone të ndryshme të vendit, përfshirë raste të dhunës në familje, armëmbajtje pa leje, lëndime trupore dhe persona të zhdukur.
Sipas raportit policor, në Prishtinë është arrestuar një i dyshuar mashkull kosovar nën dyshimin për sulm seksual ndaj një të miture, ndërsa pas intervistimit me vendim të prokurorit ai është dërguar në mbajtje.
Po ashtu në Prishtinë, në rrugën “Perandori Dioklician”, është arrestuar një shtetas i huaj pasi gjatë kontrollit policor i janë gjetur dy thika. Me vendim të prokurorit ai është dërguar në mbajtje për armëmbajtje pa leje.
Policia ka raportuar edhe për disa raste të dhunës në familje në Fushë Kosovë, Prishtinë dhe Lipjan. Në disa prej rasteve të dyshuarit janë arrestuar, ndërsa në disa të tjera janë liruar në procedurë të rregullt pas intervistimit.
Në Kaçanik është arrestuar një person i dyshuar për lëndim të rëndë trupor, pasi dyshohet se ka goditur me thikë një mashkull kosovar, i cili është dërguar për trajtim mjekësor.
Ndërkohë, në Skenderaj është raportuar një rast i vrasjes në tentativë, ku një i dyshuar ka shtënë me armë zjarri në drejtim të viktimës dhe më pas është larguar nga vendi i ngjarjes. Policia ka sekuestruar një armë gjuetie dhe fishekë në shtëpinë e të dyshuarit, ndërsa ai ndodhet në kërkim.
Policia e Kosovës ka raportuar për dy raste që lidhen me persona të zhdukur, një në Ferizaj dhe një tjetër që lidhet me periudhën e luftës në Rahovec.
Sipas policisë, më 6 mars 2026 rreth orës 14:00 në Ferizaj, është raportuar se një femër kosovare është larguar nga shtëpia dhe që nga ajo kohë nuk dihet vendndodhja e saj. Rasti është iniciuar si “person i zhdukur” dhe është duke u hetuar nga autoritetet.
Ndërkohë, një zhvillim tjetër lidhet me personat e zhdukur gjatë luftës në Kosovë. Më 9 mars 2026 në Rahovec, gjatë gërmimeve të realizuara nga njësitë përkatëse policore në koordinim me Institutin e Mjekësisë Ligjore dhe me urdhër të gjykatës, janë gjetur pjesë eshtërore që dyshohet se i përkasin të paktën një individi të zhdukur gjatë viteve 1998–1999.
Mbetjet eshtërore janë tërhequr nga vendi i ngjarjes dhe janë dërguar në Institutin e Mjekësisë Ligjore për ekzaminim mjeko-ligjor, autopsi dhe analizë të ADN-së me qëllim të identifikimit të viktimës.























