19:43 / 14.09.2026
Nesër shënohet 28-vjetori i Betejës së Kaçanollit
K. K. / RTKlive
Nesër, më 15 shtator 2026, shënohet 28-vjetori i Betejës së Kaçanollit, ndërsa në nderim të dëshmorëve dhe luftëtarëve të Ushtrisë Çlirimtare të Kosovës do të zhvillohen aktivitete përkujtimore.
Komuna e Podujevës, në bashkëpunim me organizatat e dala nga lufta e UÇK-së, ka organizuar homazhe dhe manifestim përkujtimor për të përkujtuar të rënët e Betejës së Kaçanollit.
Sipas njoftimit, aktivitetet do të nisin në ora 11:30, me homazhe në “Kompleksin e Dëshmorëve” në Penuhë.
Ndërkaq, nga ora 13:00, në Kaçanoll do të mbahet manifestimi përkujtimor, ku do të zhvillohen edhe homazhe në nderim të dëshmorëve dhe luftëtarëve të UÇK-së.























