Drejtoria e Arsimit në Prishtinë: PISA kërkon veprime konkrete në arsim
Sh.G|RTKlive
Drejtoria Komunale e Arsimit në Prishtinë ka vlerësuar diskutimin publik të organizuar nga Instituti EdGuard lidhur me rekomandimet e testit PISA për periudhën 2015–2025, duke theksuar nevojën për reflektim të thellë dhe përgjegjësi institucionale në përmirësimin e sistemit arsimor.
Sipas Drejtorisë së Arsimit, fakti që shumë prej sfidave të identifikuara në arsim vazhdojnë të përsëriten tash e një dekadë dëshmon se rekomandimet duhet të marrin më shumë vëmendje dhe të përkthehen në veprime konkrete.
Ndër sfidat kryesore të evidentuara janë zhvillimi profesional i mësimdhënësve, përmirësimi i infrastrukturës shkollore, avancimi i teknologjisë në arsim dhe fuqizimi i gjithëpërfshirjes.
Drejtoria Komunale e Arsimit në Prishtinë ka theksuar se i merr me seriozitet të lartë këto rekomandime, duke nënvizuar se ato nuk duhet të mbesin vetëm dokumente dhe zotime, por të shndërrohen në politika dhe masa konkrete në funksion të ngritjes së cilësisë në arsim.
Mesazhi i Drejtorisë është se koha për veprim ka ardhur dhe se sfidat e evidentuara ndër vite kërkojnë angazhim dhe përgjegjësi më të madhe institucionale.






















