Aktakuzë kundër dy zyrtarëve policorë për tejkalim të detyrës zyrtare
Kronika

Aktakuzë kundër dy zyrtarëve policorë për tejkalim të detyrës zyrtare

Muharrem Miftari/RTKlive

Aktakuzë kundër dy zyrtarëve policorë për keqtrajtim gjatë ushtrimit të detyrës zyrtare ose autorizimeve publike dhe lëndim të lehtë trupor, njofton Prokurori i Shtetit.

“Pas zhvillimit të hetimeve, mbledhjes dhe analizimit të provave, ka ngritur aktakuzë ndaj të pandehurve V.M., dhe A.A., në drejtim të veprave penale “Keqtrajtimi gjatë ushtrimit të detyrës zyrtare ose autorizimeve publike” nga neni 195, paragrafi 1, lidhur me nenin 31 të KPRK-së, si dhe veprën penale “Lëndimi i lehtë trupor” nga neni 185, paragrafi 1, nën paragrafi 1.4, lidhur me nenin 31 të KPRK-së”,thuhet në njoftim.

Sikundër bëhet e ditur sipas aktakuzës, "më 15 qershor 2022, rreth orës 22:40, në Stacionin policor të Fushë Kosovës, të pandehurit, në cilësinë e zyrtarëve policor, në bashkëkryerje, e kanë keqtrajtuar fizikisht dhe psikikisht të dëmtuarin L.H., në atë mënyrë që, përderisa të pandehurit e kishin ndalur të dëmtuarin në qytetin e Fushë Kosovës, për shkak të një kundërvajtje në trafik, të njëjtit i kishin marrë dokumentet dhe i kishin kërkuar që të paraqitej në stacionin policor, i cili pasi kishte arritur në stacion, të njëjtin e kishin vendosur në një zyre dhe gjatë përpilimit të fletë-kundërvajtës, të pandehurit fillimisht e kishin fyer dhe cenuar dinjitetin e pastaj të njëjtin edhe e kanë sulmuar fizikisht, duke e goditur me grushte në fytyrë e më pas me shkelma e grushte në pjesë të ndryshme të trupit”.

Tutje theksohet se me këtë, në bashkëkryerje, të pandehurit kanë kryer veprat penale të lartcekura.

Prokurori i çështjes me rastin e ngritjes së aktakuzës, i ka propozuar Gjykatës që të pandehurit e lartcekur të shpallen fajtor dhe të dënohen sipas ligjit për veprat penale të cilat iu vihen në barrë, thuhet në njoftim.


APR
Romay Lift