Ndalohen shtatë persona të dyshuar në aksionin për rastin `Brezovica`
Kronika

Ndalohen shtatë persona të dyshuar në aksionin për rastin `Brezovica`

M.Miftari/RTKlive

Prokurori i çështjes, Rasim Maloku, ka njoftuar se sot herët në mëngjes janë bastisur 11 lokacione në Prishtinë, Fushë Kosovë dhe Podujevë, me ç’rast janë arrestuar 7 persona, të dyshuar për veprat penale " dhënie e ryshfetit" dhe "fajde", ndërkohë që një person është në kërkim.

Prokuroria Themelore në Ferizaj, njofton opinionin publik se në bashkëpunim me Policinë e Kosovës, Drejtoria për Hetimin e Krimeve të Rënda (DHKR) në Prishtinë, në bazë të urdhëresës së lëshuar nga Gjykata Themelore në Ferizaj për kontrollin e shtëpive dhe objekteve përcjellës, sot ka realizuar aksionin “Brezovica” i cili është vazhdimësi i rasteve të mëhershme, ku, me ç’rast gjatë këtij aksioni, janë kontrolluar dhe bastisur njëmbëdhjetë (11) lokacione të ndryshme, konkretisht tetë  lokacione në qytetin e Prishtinës, dy (2) në Podujevë dhe një (1) në Fushë Kosovë, me ç​'rast, janë arrestuar shtatë (7) persona të dyshuar dhe të njëjtit me vendim të Prokurorit të Shtetit, janë ndaluar në kohëzgjatje prej 48 orësh, për shkak të dyshimit se të njëjtit kanë kryer veprat penale “Marrja e ryshfetit”, nga neni 421 i Kodit Penal të Republikës së Kosovës “Dhënia e ryshfetit”,nga neni 422 , “Fajdeja” nga neni 331 dhe “Ushtrimi i ndikimit” nga neni 424 të Kodit Penal të Republikës së Kosovës.

Po ashtu, gjatë këtij aksioni janë sekuestruar prova të ndryshme materiale, për të cilat Prokuroria Themelore në Ferizaj,ka deklaruar se të informojë në vazhdimësi.

Ndaj personave të dyshuar, Prokuroria Themelore në Ferizaj, brenda afatit ligjor, pritet të parashtrojë kërkesë për caktimin e masës së paraburgimit në Gjykatën Themelore në Ferizaj.

Policia e Kosovës bën të ditur se për informacione dhe detajet tjera rreth këtij operacioni do të bëhen të ditura pas përfundimit.


MË SHUME NGA Kronika