Paraburgim për dy personat që dyshohet se dhunuan 23 vjeçaren në Pejë
E. Hoti / RTKlive
Gjykata Themelore në Pejë, ka marrë vendim për caktimin e masës së paraburgimit ndaj dy të pandehurve Sh.B dhe I.G, të cilët dyshohet se kanë dhunuar një 23 vjeçare nga Shqipëria, e cila vuan edhe nga problemet mendore.
Vendimi për caktimin e masës së paraburgimit ka ardhur pas kërkesës nga Prokuroria Themelore e Pejës.
Këtë e ka bërë të ditur për RTKlive, zëdhënësi i Prokurorisë, Shkodran Nikçi.
“Prokurori i shtetit, brenda afatit ligjor ka parashtruar kërkesë për caktimin e masës se paraburgimit prej 30 ditë në Departamentin e Krimeve të Rënda në Gjykatën Themelore në Pejë, gjatë ditës së enjte. Ditën e premte të javës së kaluar kemi marrë konfirmimin nga gjyqtari i procedurës paraprake që kërkesa e prokurorisë është aprovuar dhe dy të pandehurit të dyshuar për veprën penale “Dhunimi” ju është caktuar masa e paraburgimit”, tha Nikçi.
Nikçi tha se janë duke u kryer hetime për ndriçimin e plotë të këtij procesi penal, ndërsa viktima ka marrë trajtimin e duhur.
“Prokurori i Shtetit ka dhënë autorizime për kryerjen e veprime hetimore për ndriçimin e plotë të këtij procesi penal. Ndërkaq, viktima ka marrë trajtimin e duhur, ku ka pasur mbështetje nga Mbrojtësi i viktimave, psikologja dhe psikiatri”, tha Nikçi.























