Dyshohet për një të vdekur në ashensorin e një ndërtese në Gjilan
E. Hoti / RTKlive
Policia e Kosovës ka njoftuar se ka marrë një informatë se në bodrumin e një ashensori të një ndërtese në rrugën Gjilan -Kamenicë është vërejtur një person i cili dyshohet të jetë i vdekur.
Zëdhënësi i Policisë së Kosovës për rajonin e Gjilanit, Ismet Hashani ka konfirmuar për RTKlive se rasti është raportuar në polici të hënën rreth orës 22:37.
“Policia e Kosovës stacioni policor në Gjilan kanë marrë një informatë se në bodrumin e një ashensori të një ndërtese në rrugën Gjilan-Kamenicë është vërejtur një person i cili dyshohet të jetë i vdekur”, ka thënë Hashani.
Ai njoftoi se lidhur me rastin është informuar prokurori i shtetit dhe të gjitha njësitet relevante, të cilat me urgjencë kanë dalë në vendin e ngjarjes .
Sipas Hashanit, trupi i dyshuar pa shenja jete ende nuk është identifikuar për shkak të rrethanave në vendin ku është gjetur.
“Për informatat shtesë do të ju njoftojmë në vazhdim”, ka thënë Hashani.























