Ndalet i dyshuari për sulmin me thikë ndaj dy personave në Ferizaj
Medina Pasoma / RTKlive
(E plotësuar) Prokuroria Themelore në Ferizaj ka njoftuar se ka ndaluar për 24 orë një person të mitur, i dyshuar për kryerjen e veprave penale “Sulmi ndaj personit zyrtar” dhe “Vrasja në tentativë”, sipas Kodit Penal të Republikës së Kosovës.
Sipas njoftimit të Prokurorisë, rasti ka ndodhur mëngjesin e 10 korrikut, rreth orës 07:53, në rrugën “Dëshmorët e Kombit”, në afërsi të Postës Qendrore në Ferizaj.
Bazuar në informacionet fillestare të hetimit, dyshohet se i mituri ka sulmuar me mjet të mprehtë, përkatësisht thikë, dy persona të tjerë.
Pas incidentit, i dyshuari ishte larguar nga vendi i ngjarjes, por pas veprimeve hetimore të ndërmarra nga Policia e Kosovës, ai është lokalizuar dhe më pas është ndaluar me vendim të Prokurorit të Shtetit.
Prokuroria Themelore në Ferizaj ka bërë të ditur se do të vazhdojë me ndërmarrjen e veprimeve të mëtejshme ligjore lidhur me këtë rast.
Therr me thikë dy persona në Ferizaj, kërkohet i dyshuari
Sot ka ndodhur një incident, ku një person dyshohet se ka sulmuar dy persona me mjet të mprehtë në Ferizaj.
Rasti ka ndodhur në mëngjes rreth orës 07:50, në rrugën “Dëshmorët e Kombit”, në afërsi të Postës Qendrore. Viktimat janë transportuar për trajtim mjekësor në Emergjencën e Ferizajt, pasi kanë marrë ndihmën e parë në vendin e ngjarjes nga ekipet mjekësore, konfirmon zëdhënësi i Policisë së Kosovës për rajonin e Ferizajt, Kanun Veseli.
“I dyshuari është larguar nga vendi i ngjarjes në drejtim të panjohur. Njësitë policore kanë dalë në vendin e ngjarjes dhe janë duke ndërmarrë veprime intensive hetimore për identifikimin dhe arrestimin e të dyshuarit, si dhe për sqarimin e plotë të rrethanave të rastit”, vazhdon Veseli.























