Arrestohen dy persona të dyshuar për fajde
BKT
Kronika

Arrestohen dy persona të dyshuar për fajde

Sh.Ç/RTKlive

Policia e Kosovës ka arrestuar dy persona në Gjakovë, të dyshuar për veprat penale “Fajdeja”, “Detyrim” dhe “Mbajtja në pronësi, kontroll ose posedim i paautorizuar i armës”.

Sipas njoftimit të Policisë, Njësia Rajonale e Hetimeve në Gjakovë, në bashkëpunim me Drejtorinë për Hetimin e Krimit të Organizuar dhe Krimeve të Rënda dhe njësitë e tjera policore, kishte pranuar informacione operative lidhur me një rast të dyshuar të fajdes.

Hetuesit policorë, pas zbatimit të masave të veçanta hetimore, kanë arritur t’i kapin dy të dyshuarit në flagrancë, gjatë marrjes së pagesave të kamatës nga një viktimë.

“Hetuesit policorë kanë zbatuar masa të veçanta hetimore dhe kanë arritur që dy të dyshuarit të kapen në flagrancë gjatë marrjes së pagesave të kamatës nga viktima, me ç’rast janë arrestuar”, thuhet në njoftimin e Policisë.

Pas arrestimit, me urdhër të gjykatës janë kontrolluar shtëpitë dhe objektet përcjellëse të të dyshuarve. Gjatë kontrollit, sipas Policisë, janë gjetur edhe disa fishekë.

Të dyshuarit janë intervistuar nga hetuesit, ndërsa me urdhër të prokurorit kompetent janë dërguar në mbajtje për 48 orë.

Ndaj tyre janë iniciuar raste për veprat penale “Fajdeja”, “Detyrim” dhe “Mbajtja në pronësi, kontroll ose posedim i paautorizuar i armës”.

Policia e Kosovës ka deklaruar se mbetet e përkushtuar në luftimin e krimit të organizuar dhe veprave penale që, sipas institucionit, cenojnë sigurinë dhe rendin publik.

Të arrestuarit janë të dyshuar dhe përfundimi i rastit do të varet nga procedurat e mëtejshme hetimore dhe gjyqësore.


MË SHUME NGA Kronika